لواء سامي دنيا يكتب صرخة و كلمة 🇪🇬

 

صرخة وكلمة حق   ألحق شعبك ياريس  شعبك  يستجير بك 

بقت عادة كل ما نفرح ببلدنا ويرجع المحبط اليائس يضم تانى ع بلده …كل ما نركن معاناتنا ونتناساها ونعلى مصلحة مصر معشوقاتنا 

كل ما تضربنا الحكومة قلم ورا التانى بمنتهى الغباء والتحدى …ايوة شعبنا صبور أيوة بنحب تراب بلدنا ايوة عارفين قدر رئيسنا لكن الصبر له نهاية وعشان بنحب بلدنا وبنحترم رئيسنا لابد نتكلم ..من حقنا نقول جاااااااااااى من حقنا نعبر عن غضبنا من وحشية حكومتنا 

من حقنا نوجه كلامنا لرئيسنا اللى عارف ان ثباتنا وتحملنا هو رمانة الميزان …خلاص ماينفعش نلوم الحكومة لإننا كفرنا بيها من كتر قسوتها علينا وتحديها لصبرنا..ورئيس السلطة التنفيذية هو رئيسنا اللى لابد يوصله غضبنا كجرس إنذار صوته عالى أوى…فين كلامك يا ريس "هذا الشعب لم يجد من يحنو عليه

فين وعدك يا ريس "احنا مانقدرش نشوف شعبنا مروع احنا نروح نموت أحسن "!!!!!!!!!!!

الترويع مش بس ارهاب ياريس ..الترويع هو فقد الأمان واحنا بالفعل فقدناه لما فقدنا الستر…البلطجة بتنتشر لإن الناس مش لاقية تاكل وتتعالج وتتعلم وتركب ..الخ واتحملت وماخرجتش…الناس اللى عايشة خايفة لتترمى ف الشارع ومعهاش تدفع حتى نقل عفش مش تمن شقة…فقدت سترها وأمانها ورغم ذلك حطت جزمة ف بؤها لاجل خاطر بلدها المتهددة ومخرجتش اصحاب المعاشات اللى بيموتوا بالبطئ ومش لاقية تجيب علاجها ولا قادرة تمد إيدها لعيالها…فقدت حيا وشها واتذلت حرفياً لكنها اتنازلت وضحت بقوتها وصحتها وقبلت بذلها ومخرجتش…الناس اللى معندهاش بمليم إنتماء واخدة حقها ومتنغنغة والناس اللى معبية انتماء عايشة مقهورة 

الفساد والرشوة والمحسوبية بتشغى وكل شئ ماشى بالقرش حتى كرسى مجلس النوايب بيتباع …الناس انطحنت واتفرمت مش بس م القرارات الوحشية لكن من احساسها ان محدش دارى بيها …ودا أكبر خطر على مصر ولازم يوصل لآذان ريسنا ان شعبه اصبح بيتمنى الموت عن الذل…سمونا المطبلاتية وكنا بنفخر بتطبيلنا لبلدنا أحسن من غيرنا اللى بيطبل بمنتهى الوقاحة لعدوها…وألف باء التطبيل اللى انا اعرفه ان لما بلدى تتعرض لخطر أطبل أكتر عشان صوتى يوصل……….ايوة الدعم لابد يتشال ايوة بيتشال ع مراحل لكن قبل ما تشيل يا اخى حصن الناس المضرورة…مش تبقى الحالة هباب وانا عمال ازود الهباب ..أصل الشعب حمول الشعب واعى الشعب صابر

لأ مش كده ..حرام ..لو الحكومة فقدت المشاعر والإحساس بالناس ومعندهاش مقياس للضغط …فأكيد الكبيرعنده بدل الجهاز 100 يقدر يقيس نبض الشارع ويلحق الشعب والبلد قبل الإنفجار…الحكومة ظلمت الشعب وقسمته وأحبطته وأحاديث رئيس الحكومة كلها كذب واستفزاز وتعالى…نصفت الغنى وداست ع الفقير جبرت اللاجئ وفرمت ابن البلد وساعدت الحيتان يمصوا دمنا

اتفننت ازاى تمتص الإنتماء ولا أجدع سفنجة..وفككت الأيادى وشرخت التلاحم ولا أجدع عدو….وزى ما كانت صفحاتنا دوماً بتعزف بمنتهى الصدق والحب لحن سعيد عن الوفاء والإنتماء ….نعزف اليوم بمنتهى الألم وبمنتهى الأدب لحن حزين ليصرخ الناى بصوت مرير فى أذن الكبير الكبييييير اووووووى حفظه الله ….ًانقذوا ما تبقى منهم من عزة النفس والحياء بعد طول عناء ..وارفعوا عنهم بربكم هذا البلاء (((     شعبك يصرخ ياريس   ...  كان لازم اكتب لأني أعلم أنك لن تسكت  ))). ========

=== سيدي الرئيس : كل الناس بتسأل باستنكار وشك كمان هو يعنى الرئيس ميعرفش القرار ده ولا بموفقته ؟؟؟ …الرئيس اجتمع بالحكومة وده نزلناه بالتفصيل فى تقريرنا …قلنا تعليمات واوامر صدرت نتيجة قوة اقتصاد مصر وتوفر كل العملات الصعبه وزيادة الاستثمارات وارتفاع معدلات التنميه ….بإنهاء برنامج صندوق الماسونيه والبنك الدوليين وقبل …عام ٢٠٢٦م وعدم الدخول فى برامج اخرى ==الهدف تحسين مستوى معيشة المواطنين والتخفيف عنهم == مع عرض خطه تفصيليه للتخفيف عن المواطنين وخاصة الأولى بالرعاية والاستفاده من حصيلة رفع الدعم عن المحروقات ==الحكومه التزمت حرفيا بالشق الأول ونفذت خطوات كبيره مره واحده لرفع الدعم ورفع اسعار الطاقه والمحروقات وده مش من دلوقت لا ده خلال كل عام ٢٠٢٥م == لكن الشق الثانى بيدار من الحكومه بشكل غير سليم…رفع الدعم عن المحروقات : == رسائل متواصله على مدار شهرين== ثم تنفيذ رفع الدعم بالفعل …وتجاهل كامل (( بند التخفيف عن المواطنين ))===الناس مستغربه اننا فى قمة الغضب== فى قمة الغضب لان مفروض زيادة دخول تخفف اثار رفع الدعم خاصة اما يتم مره واحده بالشكل ده == فى قمة الغضب لان المخاطره بتماسك الجبهه الداخليه ده كارثى == فى قمة الغضب لان مش دى الاجراءات اللى طلبها الرئيس(( دى نص الاجراءات فقط ))

== والتقارير هتدخل للرئيس من كل الأجهزه بلا استثناء بكل هذا الغضب الشعبى الهائل

== لكن اللى مضايقنا ان مهما كان القرار مش هيصلح الكراهيه المتصاعده والحنق والغضب وعدم الثقه اللى بيتم زرعها كل يوم بين الشعب وبين الحكومه…وده فى الشعوب بيتأصل وبيكون كارثى وتغييره بياخد وقت طويل وبيكون صعب جدا == يعنى حتى لو اتغيرت الحكومه كلها هيفضل جوه كل الشعب المصرى عدم ثقه فى الحكومه حتى لو جديده 

== خاصة مفيش حرف او كلمه او وعد وعدت بيه الحكومه وحصل او اتحقق (( كل اللى اتحقق العكس )) …== كده الرد بدقه عن السؤال اللى محدش بيجاوبكم عليه……

حفظ الله مصر الحبيبة والحمد لله رب العالمين…… وإذكروا الله كثيرا لعلكم تفلحون.