اللواء سامي دنيا يكتب علي مسئوليتي الشخصية

 

 اللواء سامي دنيا يكتب  

علي مسئوليتي الشخصية

🟣 غينيا_بيساو

■جمهورية الموز....غينيا بيساو للى ما يعرفش يا أصدقاء ……دى دولة فى غرب إفريقيا على سواحل المحيط الأطلنطى وتعداد سكانها ٢ مليون فرد ... آه بجد يعنى قد سكان العجمى فى إسكندرية ولا مؤاخذة!!!

■يعنى بأمانة كدا ممكن نحكمها بظابط و إتنين أمناء شرطة وكام عسكرى!!!

■مشكلة غينيا بيساو بقا كدولة إن نص سكانها تحت خط الفقر يعنى من أفقر الدول فى العالم رغم إنها بتمتلك سواحل على المحيط الأطلنطى دا غير الثروات الطبيعية!!!

■خط فقر إيه بس...!!!

■دا لو الإتنين مليون فرد دول نزلوا يصطادوا من المحيط هيلاقوا ياكلوا بس تقول إيه بقا!!!

■عدم توافر الإرادة السياسية!!!

■كان بيحكم غينيا بيساو رئيس إسمه عمر المختار سيسكو من سنة ٢٠٢٠ ..

■وكان أصلاً رئيس وزاراء من ٢٠١٦ !

■الراجل قعد يفكر إزاى يغنى الشعب بتاعه فعمل إيه بقا!!! بدل ما يوفرلهم مراكب صيد يصطاوا ولا حتى يزرعوا أو يصنعوا أى حاجة فى حياتهم دول حيالله إتنين مليون نسمة يعنى مش هيغلب فى أكلهم!!!الراجل قلب البلد لعصابات تجارة المخدرات!!!

■وربنا كرمه وقدر يخليها عصابات دولية تستلم المخدرات من أمريكا الجنوبية ويصدرها لأوروبا.....شغل فاخر من الآخر يعنى!!!يوم الأربعاء إللى فات بقا كان فى إنتخابات رئاسية فى غينيا بيساو بين الرئيس عمر سيسكو وواحد معارض إسمه فرنادو دياس!!! الشعب الغينى صحى من النوم يوم الأربعاء إللى فات ولسه بيقولوا يا فتاح يا عليم يا رزاق يا كريم نبدأ الإنتخابات لقيوا الجنرال دينيس ناكنها طالع فى التلفزيون فى برنامج صباح الخير يا غينيا وبيعلن الإنقلاب العسكرى وبيقبض على عمر سيسكو والمعارض التانى فرناندو دياس ورئيس الأركان ورئيس الجيش!!!

■ناكنها قبض عليهم كلهم وحطهم فى السجن وأعلن الأحكام العرفية وتوقيف الدستور وغلق الحدود ....وطلع قال كفاية كدا فقر وكفاية كدا مخدرات يا ولاد كوم شكاير الكلاب!!! وأعلن إلغاء الإنتخابات كمان...!!

■وقال .... من النهاردة مفيش رئيس ..... أنا الرئيس أنا الرئيس... فاكر نفسه أحمد السقا فى الجزيرة ١ .. بصوت أحمد السقا!!!

🟣 وع الناحية التانية من العالم ...

🟣 أمريكا ....أكبر جمهورية موز فى العالم...!!

■لو إنت فاكر إن غينيا بيساو جمهورية موز وكدا علشان إللى بيحصل فيها...فتعالى أقولك بقا على أكبر جمهورية للموز فى العالم .... أمريكا!!! يوم الأربعاء إللى فات برضوا .... يا أخى شوف محاسن الصدف!!!يوم الأربعاء إللى فات بعد الضهر كدا وفى عز النهار حضرتك وترامب كان مقيل شوية فى البيت الأبيض ...

حصل إطلاق نار على البيت الأبيض وإصابة إتنين من الحرس الوطنى ... خد بالك دا فى عز الضُهر يعنى مش بالليل ولا حاجة!!!

■واحد بيقولوا إن إسمه رحمن الله من أفغانستان وكان عايش فى أمريكا من ٢٠٢١ ...

■ترامب يسكت على كدا .... أبداً!!!

■دا طلب من الجيش الأمريكى نشر ٥٠٠ جندى إضافى من الحرس الوطنى حوالين البيت الأبيض علشان يعرف ينام!!! يا برنس دا إنت مش عارف تحمى البيت الأبيض وعايز تحمى العالم!!! يا أسطى...الكلام ده مبيحصلش غير فى جمهوريات الموز فى إفريقيا!!!

🟣 وع الناحية التانية من العالم ....

🟣 إيران ....طلع النهاردة وزير الدفاع الإيرانى عزيز نصير زاده وقال...الأهم هو إستعدادنا....

■نحن نرصد التهديدات، ومستعدون للرد على أى تهديد بشكل أقوى من ذى قبل" ..

■رد إيه بس يا عم الحج والشعب الإيرانى هيموت من العطش وإحتمال تنقلوا العاصمة الإيرانية بسبب العطش!!!

■يا عم بطلوا بقا فاتحة الصدر دى وإنزلوا لأرض الواقع وشوفوا الشعب الإيرانى!!!

🟣 وع الناحية التانية من العالم ....

🟣 فنزويلا....فنزويلا دى الدولة إللى فى أمريكا الجنوبية إللى أمريكا محاصراها بالبوارج البحرية بحجة المخدرات!!! أيوا حضرتك فنزويلا إللى عندها تانى أكبر إحتياطى بترول فى العالم!!! أظن كدا عرفتوا ليه أمريكا محاصراها .... أيوا علشان المخدرات .... بترول مين يا معالى الجنرال!!! طلع النهاردة رئيس فنزويلا نيكولاس مادورو وهو لابس الزى العسكرى ومعاه سيف .... آه بجد سيف بحق وحقيقى وقال....يجب أن نكون مستعدين للدفاع عن كل شبر من هذه الأرض المباركة من أى تهديد أو إعتداء إمبريالى، مهما كان مصدره... الوطن مقدس ويجب إحترامه"....

■والسلام عليكم ورحمة الله وبركاته...

■طب الحمد لله إنه طلع بسيف ومطلعش بمطواه قرن غزال!!!!! عالم عجيب يجنن فعلا.

🟣 وع الناحية التانية من العالم ...

🟣 السودان ...شوف أنا مش هتكلم عن إللى بيحصل فى السودان!!!بس خلاصة الخلاصة ...

■لما الجيش السودانى بدأ يدوس ع الدعم السريع ويحقق إنتصارات وحميدتى وافق على الهدنة حصل إيه!!! تعالى يا بنى طلعلهم الخطة إللى كل مرة بنضحك بيها ع العالم ....

■خطة إيه يا جنرالنا !!!شوف يا سيدى واشنطن بتتهم الجيش السودانى إنه إستخدم سلاح كيماوى فى الحرب...!! يا سنة سوخة يا معالى الجنرال....طب وبعدين ؟؟

■لا دا إتهام كوميدى حضرتك ...

■أصلهم بيقولوا إنهم حاسين إن الجيش السودانى إستخدم الكيماوى سنة ٢٠٠٩ آه بجد و ٢٠١٦ مش الأيام دى!!! وقال إيه عايزين الجيش السودانى يعترف بكدا!!!

■إللى هو لو أعترفوا كل قيادات الجيش السودانى هيتحاكموا كمجرمى حرب عن حاجة حصلت سنة ٢٠٠٩ عمرك شوفت كوميديا كدا ..... آه بجد!!! أنا بس عايز أقولك إن إللى رابك المشهد فى الجيش السودانى إنه بيضم كتايب من الجماعات الإسلامية والاخوان المسلمين!!! أظن كدا إنت فهمت عزيزى متابع الجنرال إن مفيش ميتين أم أى فايدة من الجيش السودانى طول ما فيه جماعات إسلامية!!! وأظن إنت كدا فهمت ليه كانت بتحصل إنسحابات وإنهيارات فى تقدم الجيش السودانى!!! المصيبة إن البرهان مش عارف يتخلص منهم .... لا هو مش عايز يتخلص منهم وبيقول دول شركاء فى الوطن وهى دى نقطة الخلاف!!!للاسف للاسف لحد صلاة الظهر.

🟣 وع الناحية التانية من العالم ....

🟣 المغرب...أيوا المغرب بتوع إفتحوا الحدود يا مصاروة باش نحرر القدس!!!

■المغاربة بقا وبتتمثل فى وزارة التجارة والصناعة المغربية أعلنت فرض رسوم إغراق على المنتجات المصرية من 

ال PVC ..وصلت ل ٩٠ ٪ ..... آه بجد الكلام دا!!! ليه يا عم الحج المصاروة عمللكم إيه ؟

■قالك إن التحقيق أثبت بشكل نهائى وجود إغراق وعلاقة سببية أضرت بقطاع الإنتاج المغربى، لذا سيتم تطبيق رسم نهائى مضاد للإغراق على الواردات المصرية....

■هما فين ولاد كوم شكاير الكلاب إللى بيقولولك هو السيسى مش شاطر غير فى الطرق والكبارى ومبيعملش مصانع!!!

■أهى المغرب بتشتكى إن الصناعات المصرية من البولى غرقت السوق عندهم لدرجة إن التقرير بيقول .... تم تحديد وجود ضرر مهم بقطاع الإنتاج المغربى نتيجة لإرتفاع ملحوظ فى حجم الواردات المصرية وتأثيرها الكبير على الأسعار المحلية، مما أدى إلى تدهور مؤشراته الإقتصادية والمالية فى المغرب مثل فقدان الحصة السوقية وتدهور الربحية، وفقاً لموقع "هسبريس" المغربى...!!

■هتقولى يعنى إيه يا جنرال أنا راجل بسيط مش بتاع إقتصاد فهمنى الحته دى!!!

■يعنى بالبلدى كدا الصناعات المصرية من البولى PVC  سيطرت على السوق المغربى علشان رخيصة وأكثر جودة من المنتج المغربى ودا هيتسبب فى غلق المصانع عندهم وفقد الحصة السوقية وتعطيل الإقتصاد المغربى ...

■طب الحل إيه!!!إنهم يفرضوا رسوم إغراق على المنتج المصرى بنسبة ٩٠ ٪ علشان يجبروا المستهلك المغربى يشترى المنتج المغربى!!!

■طب يعنى نحب المغرب ولا نكرهها بسبب كدا يا جنرال ؟ لا تحبها ولا تكرهها وكل دولة من حقها إنها تحافظ على القاعدة الصناعية عندها وتنميها علشان دى إسمها حرب إقتصادية وتنافسية لو ما أكلتش إللى قدامك هياكلك!!!نرجع ونقول إن إللى خلى منتجاتك تسيطر على الأسواق ده وبالشكل المرعب ليهم ده هو وجود قاعدة صناعية إتعملت عندك فى مصر فى عهد السيسى مع خفض سعر الجنيه خلى منتجاتك أكتر وأرخص وأكثر جودة!!!

■يا أسطى دول ٦٨ الف مصنع إتبنوا فى عهد السيسى يعنى منتجاتك مش هتغرق المغرب وبس دى غرقت الخليج كله ودول شمال إفريقيا بُص إنت بس على أى منتج بتشتريه وشوف بلد المنشأ وإنت هتنبهر بجد!!!

■لما تركز فى الخبر كويس هنعرف ليه الدول دى بتكره نهضتك وتقدمك ..علشان التحقيق المغربى بيقول ... وجود أضرار على الإنتاج المغربى بسبب المنتجات المصرية!!!

■لا وييجى جاهل يقولك هو إحنا عندنا تصنيع ولا بنعرف نصنع حاجة!!! يبقا حط الخبر ده فى ...... ممممم عينه ومشيها عينه!!!

🟣 🟣 وع الناحية التانية من العالم ....

               🟣 تحيا مصر 🟣

🟣 وفى تحيا مصر ...

 .                 ♦️ الصين الجديدة ♦️

■الدنيا كلها مقلوبة بسبب إن الصين بتبنى صين جديدة!!! آه يا عم الصين إللى هى أكبر مصنع فى العالم  إللى كل يوم تطلع تتخانق على تايوان مع أمريكا واليابان!!!

■على فكرة دا مش كلامى ....دا كلام كل وكالات الأنباء!!! إن الصين بتبنى صين جديدة فى مصر حوالين قناة السويس!!!

■شوف يا سيدى التقرير بيقول ...إن المنطقة المحيطة بقناة السويس بتتحول إلى معقل للشركات الصينية فى مصر، مع إستمرار تدفق الإستثمارات، والمستثمرين الصينيين، وتأسيس 125 مشروعًا بالمنطقة السنادى بغرض التصدير، ليكونوا ثانى أكثر جنسية بعد المصريين تدشينًا للمشاريع فى المنطقة!!!

■مش كدا وبس....!!! طب أفاجأك وأقولك إن فى أكثر من 2800 شركة صينية فى مصر بإستثمارات تتجاوز 8 مليارات دولار!!!

■مش كدا وبس...!!! السنادى بس...!!

■المنطقة الإقتصادية لقناة السويس وقعت عشرات العقود مع شركات صينية أكبرها عقد شركة "سايلون" الصينية إللى بيوصل قيمته مليار دولار، لتصنيع إطارات السيارات...!!

■مش كدا وبس...!! دا كمان عقد شركة CJN لإنشاء مصنع أسمدة فوسفاتية بمدينة "سخنة 360" إللى بتطورها شركة السويدى للتنمية الصناعية بالمنطقة الإقتصادية لقناة السويس بإستثمارات تصل إلى مليار دولار!!!

■أنا بس عايزك تفتخر بعبقرية الدولة المصرية فى عهد السيسى!!

■هتقولى إزاى يا معالى الجنرال؟ شوف يا سيدى....أهل الشر قفلوا قناة السويس تلات سنين بحجة الحرب على الحوثيين علشان يخنقوا إقتصاد مصر وتوافق ع التهجير!!!

■تقوم الدولة المصرية معلقة يافطة كبيرة عند باب المندب وكاتبه فيها القناة مغلقة للإصلاح وفى خلال التلات سنين دول مصر بنت أكتر من ٢٠٠٠ مصنع فى المنطقة الصناعية فى قناة السويس وطورت ميناء العريش وخلته ميناء عالمى ...مش كدا وبس...!!!

■وربطت ميناء السخنة بالبحر المتوسط بخطوط سكة حديد وقطار كهربائى سريع علشان بدل ما السفن تعدى من القناة وتتاخر تنزل حمولتها ع القطر وتوصل البحر المتوسط فى ساعتين زمن بدل ما كانت بتاخد أسبوع   ..... عمرك شوفت عبقرية كدا!!!

■يعنى مقعدناش نعيط ونلطم على غلق قناة السويس حضرتك!!! دى الدولة المصرية قدرت تحول المحنة لمنحة!!!

■والإسرائيليين والأمريكان دلوقتى بيقولوا يا ريتنا ما قفلنا قناة السويس!!!

🟣 كمان_فى _تحيا_مصر ....

■تعالوا بقا أحكيلكم على أسطورة من أساطير السيسى إللى تعتبر حلم وبيتحق على أرض مصر.....بما إننا بنتكلم على الصين الجديدة إللى بتتبنى ...فى شركة صينية عملاقة إسمها  شين فينج دى عملاق الصناعة فى الصين...!!

■الشركة دى عملت إيه يا معالى الجنرال!!!

■لا الشركة دى مش هتبنى مصنع هنا فى مصر حضرتك!!! لا دى خلاص بتنقل كل مصانعها هنا فى مصر بكل تكنولوجيا التصنيع!!!

■هتقولى يعنى إيه يا جنرالنا ....!!شوف يا سيدى....شركة شين فينج الصينية نقلت إلى مصر مجمعًا صناعيًا عملاقًا بحجم إستثمارات 1.56 مليار دولار....ودا يُعتبر أضخم إستثمار صينى منفرد فى مصر لحد دلوقتى...!!

■أيوا يعنى المجمع ده هيعمل إيه يا جنرال فى مصر!!! يا سيدى المجمع ده يعتبر ثورة حقيقية فى صناعة مكوّنات وقطع الغيار...!!!

■علشان بيضم 9 مصانع كبرى ...

١- مصنع أنظمة الفرامل ومكونات السيارات ...

٢- مصنع المكونات الدقيقة للأجهزة المنزلية ...٣-مصنع قطع غيار الآلات الهندسية زى المسامير والصواميل والبراغى ...

٤-  مصنع مكونات معدات البناء زى خلاطات الخرسانة ...٥- مصنع قطع غيار الحفارات واللوادر  ...ومصانع كتير جوا المجمع ده...!!

■إمتى بقا المصانع دى إنتاجها يخرج للنور يا وزيرنا ونشوفها!!! شوف يا سيدى ... هتبدأ المرحلة الأولى من المشروع فى الإنتاج فى يناير 2027....!! إستنوا بس ٢٠٢٧ وهتنبهروا بجد!!!فين بقا الناس البائسة المبتئسة إللى مخلية حياتنا كلها بؤس وبتقول السيسى مبيبنيش مصانع ..... مش سامع صوتهم ليه!!!

🟣 كمان_فى _تحيا_مصر ....

■ال CNN  منزلة تقرير وبتقول هو إيه إللى بيحصل فى مصر...!! مصر بتقفل سنة ٢٠٢٥ على ١٨ مليون سايح!!! ودا رقم تاريخى فى حياة المصريين!!! ال CNN  مش مستغربة من الرقم قد ما هى مستغربة من نوع السائح إللى جاى مصر وبتقول إن مصر طول عمرها كانت بتستقطب السياح الروس أو الأوكرانيين إللى بيعتبروهم سياحه درجة تانية يعنى!!!

■ال CNN  بتقول لا دا الحال إتغير فى مصر وبقا نوعية السائح إللى بييجى مصر إتغيرت تماماً وبقا درجة أولى من السوق الأوروبى وأمريكا!!! وأن إيرادات السياحة السنادى هتقفل ال ١٧ مليار دولار!!! نخمس وبخر بقا فى وشهم!!!انا بخمس اهه .

🟣 كمان_فى _تحيا_مصر ....

■الفقرة دى مخصوص لتركى آل الشيخ إللى طلع وقال هما المصريين علمونا إمتى ؟؟

■مبدأياً كدا لازم تعرف إن العلاقة المصرية السعودية طول عمرى بقولكم إنها على أعلى مستوى من التنسيق بين الدولة العميقة!!!

■إنما الخلافات والخناقات والهبل ده، دا موجود ع السوشيال ميديا وبس!! 

■ومعظمهم الأكونتس طلعت فِيك وكلنا عرفنا مين إللى وراه بسبب إللى حصل على موقع X  لما فضحهم كلهم!!! طب على أرض الواقع يا معالى الجنرال....!!على أرض الواقع فى تنسيق وتكامل رهيب!!!شوف يا سيدى هحكيلك نبذة صغيرة ....الإسبوع إللى فات ..... وفد الهيئة السعودية للتخصصات الصحية جه زيارة رسمية موسعة لكلية طب قصر العينى فى القاهرة ...خد بالك الهيئة السعودية للتخصصات الصحية هى أكبر هيئة طبية فى السعودية!!! و كان معاهم الأستاذ الدكتور محمد لطيف الرئيس التنفيذى للمجلس الصحى المصرى...!! كان فى إستقبالهم فى القصر العينى بقا الأستاذ الدكتور حسام صلاح عميد الكلية ورئيس مجلس إدارة مستشفيات جامعة القاهرة، والأستاذ الدكتور حسام حسنى المدير التنفيذى للمستشفيات الجامعية....!!!

■الدكتور حسام صلاح عميد الكلية عبقرى بجد يسكتلهم ... أبداً!!! تعالى يا حبيبى إنت جيت فى ملعبى...وطلع وعرض إمكانيات القصر العينى وكلية طب جامعة القاهرة ووراهم عظمة مصر الطبية وصرح من صروح الطب فى مصر!!! مش كدا وبس...!!

■دا إستعرض الإمكانات الكبيرة إللى بتمتلكها الكلية من بنية تحتية طبية وتعليمية متقدمة ....وإللى بتضم العديد من الوحدات والبرامج المتخصصة زى وحدة الإيكمو المتفردة بالشرق الأوسط وإللى مفيش زيها إللى كنت كلمتكوا عنها قبل كدا!!!

■ووحدة السكتة الدماغية!!!وكتير  من الوحدات الطبية المتطورة طبياً... 

■مش كدا وبس...!!! وإستعرض كمان إمكانيات الكلية من مهارات إكلينيكية عالية ومعامل متقدمة ونظم محاكاة تدريبية دى إللى بتساهم فى إعداد أطباء مؤهلين وفق أرقى المستويات العالمية .... ■وحط تحت العالمية ميت خط!!!  أومال إنتوا فاكرين الطبيب المصرى من أمهر الأطباء ليه!!!

■مش كدا وبس خد الكبيرة بقا...!!

■إن رغم توافر الإمكانيات دى كلها إللى ممكن السعودية تقدر توفروها بفلوسها طبعاً!!!

■بس إحنا عندنا جيش من أعضاء هيئة التدريس مش هتلاقوه فى أى بلد فى الشرق الأوسط وإفريقيا ... يعنى عندك كلية واحدة فى مصر بتمتلك قد ايه يا جنرالنا!!! ■الكلية بتضم أكثر من 6700 عضو هيئة تدريس و هيئة معاونة وأكتر من 14 ألف طالب فى مرحلة البكالوريوس  دا غير  1000 دارس للدراسات العليا!!! القدرات الهائلة دى بتمكّن الكلية من تقديم برامج تدريب طبى واسعة وشاملة بتعتمد على الأحتكاك الإكلينيكى المباشر 

دا غير إنها بتتميز بتنوع الحالات وثراء الخبرة الطبية التطبيقية بما يعزز مستوى التدريب فى مختلف التخصصات....!! طب ليه عميد كلية طب القصر العينى عرض الأرقام و الإمكانيات المرعبة دى على الوفد السعودى يا جنرالنا!!!

■علشان الإمكانيات الرهيبة دى إللى موجودة فى كلية واحدة مش موجودة ف أى دولة فى الشرق الأوسط وإفريقيا و علشان كمان القدرة دى والإمكانيات دى هى إللى بتمنح قدرة فريدة على إحتضان برامج البورد المصرى والتدريب السعودى....!! فى نهاية الزيارة المهمة دى لمصر ولكلية الطب قصر العينى .... تم اختيار كلية طب قصر العينى كمحطة رئيسية للتدريب للأطباء السعوديين!!! ودا علشان ما تمتلكه من تاريخ عريق، وبنية تحتية قوية، وإمكانات بحثية وإكلينيكية متقدمة، وقدرتها على إستيعاب أعداد كبيرة من المتدربين فى إطار شراكات تدريبية واسعة بين الجانبين المصرى والسعودى!!! عارف إنت لَمَّا دولة تقول هنرسل بعثات للخارج علشان يتعلموا!!!

■أهو الأطباء السعوديين هييجوا فى بعثات لمصر يتدربوا ويتعلموا علشان ياخدوا البورد المصرى!!! فين بقا تركى ولا مؤاخذة آل شيخ إللى طلع وقال هى مصر علمتنا إمتى ؟؟

■أهى علمتكم ... وبتعلمكم .... ولسه هتعلمكم!!! شكراً للرئيس السيسى إللى وصلنا للمكانة دى!!! شكراً للعميد ا.د /حسام صلاح ...إللى قدر يوفر الإمكانيات الرهيبة والتقدم العلمى الرهيب إللى وصلتله كلية طب جامعة القاهرة!!! شكراً ا.د/حسام حسنى المدير التنفيذى لمستشفيات جامعة القاهرة ... اللى قدر بعبقرية يستعرض الإمكانيات الطبية المهولة لمستشفيات قصر العينى!!!

■ شكرا ا.د/ هانى العسلى نائب المدير التنفيذى .. كفاية_كدا النهاردة ...... علشان أنا عارف إن حضراتكم مبتحبوش المقالات الطويلة!!!……. حبايبى بحبكم ….. والحمد لله رب العالمين ….. وإذكروا الله كثيرا لعلكم تفلحون.